Perqué eth 8M?

Eth 8 de març, Dia Internacionau des Hemnes, mèrque un hèt cruciau ena celebracion des lutes e victòries des hemnes ath long dera istòria.

Ena Val d'Aran mos comprometem fèrmament damb era equitat de genre e amassam es nòstes votzes entà promòir era defensa des principis fondamentaus que simbolize eth 8M.

8m en nòste territòri

Messatge 8M

2024

#hemnesespòrteresiténcia #donesesportiresistència #mujeresdeporteyresistencia

Pendent diuèrsi ans, era Val d'Aran a estat reconeishuda coma un referent en diuèrses disciplines esportiues. Per aguest motiu, actuauments, eth lèma deth 8 de març vò revalorizar eth territòri e méter en centre era resisténcia des hemnes ena sua luta diària, ja sigue en contèxte esportiu o en politic e sociau. D'aguesta manèra, se vò commemorar era constància, era capacitat de superacion e era resisténcia fisica e mentau des hemnes en espòrt, en tot establir un parallelisme damb eth sòn papèr ena reivindicacion dera igualtat de genre.

Era campanha de sensibilizacion, emparada pera etiqueta "hemnes, espòrt e resisténcia", da supòrt ath messatge de 2024 e a coma objectiu crear consciéncia sus era importància d'equilibrar eth terren de jòc en tèrmes d'oportunitats e drets entàs hemnes. Ath delà, tot açò se representarà en un manifèst institucionau que se liegerà eth 8 de març, e tanben en testimoniatge des relhèus dera Xau Corsa Aran pes Hemnes.

Lectura deth manifèst

Vos convidam a higer-vos damb nosati e nosates eth 8 de març tàs 12.00 ath deuant deth Conselh Generau d’Aran entà préner part ena lectura institucionau deth manifèst deth 8M.

Hèm extensiva aguesta invitacion a tota era populacion entà que se hige ad aguest eveniment e dongue supòrt as idees que defenem ena luta pera igualtat deth genre.

Ath delà, pendent era lectura deth manifèst, compdaram damb era participacion d'escolanes e escolans der Institut Aran entà mostrar eth sòn supòrt en aguest moment significatiu.

Ei important indicar qu'en cas de ploja, er eveniment se harà ena Sala Polivalenta dera madeisha localitat.

Exposicion urbana

#hemnesespòrteresiténcia #donesesportiresistència #mujeresdeporteyresistencia

Ena nòsta iniciativa entath 8M, auem dessenhat ua exposicion urbana que vò relheuar era connexion pregona entre eth contèxte esportiu e era vida sociau coma dus sectors cruciaus dera luta e era resisténcia femenina. Ath long dera corsa deth 8M, plaçaram estrategicament cartèus illustratius en endrets clau, coincidint damb es cambis de relhèu dera corsa pes hemnes.Es punts de cambi de relhèu seràn: Era Escòla Mairau, er Institut d'Aran, eth Pònt der Espitau, eth Cap dera Vila e en Conselh Generau d'Aran.

Aguestes illustracions remassen era esséncia dera constància, er esfòrç, er instint de superacion, eth talent e era estratègia, valors fondamentaus compartidi tanben en terrenh esportiu e ena vida vidanta.

Volem dar importància ad aguesti espacis coma scenaris d’empoderament femenin, a on es hemnes demòstren era sua fòrça e era sua determinacion, e contribuïssen ara construccion d'ua societat mès equitativa e inclusiva.

Nau modèl de Corsa Xau CORSA ARAN PES HEMNES

Era Xau Corsa Aran pes hemnes, Relhèus Collaboratius programada entath 17 de març, se presente coma un eveniment culturau, sociau e simbolic que da supòrt ara visibilitat e resisténcia des hemnes en nòste territòri. Enguan, entath detzau aniversari, era organizacion presente er innovador modèl de Relhèus Collaboratius damb aguesta intencion:Fomentar ua corsa collaborativa e cooperativa

Aguest modèl nau defen ua perspectiva non competitiva, fomente era sororitat entre hemnes e vò eludir era competicion entre eres. Ei ua corsa a on se participe en grop! E er objectiu des relhèus ei hèr a passar un testimòni de man en man entà lieger-lo en acabar. Per aquerò, es detalhs dera corsa son:

• Eth recorrut compde damb quate endrets clau, eth prumèr e eth darrèr des quaus ei era plaça deth CGA, mès i a tres lòcs importanti peth camin.
• En cada endret clau i aurà un grop de gent, damb es persones que s’encueden de portar eth relhèu damb drapèus qu’encoratgen as participants dera corsa e que demoren qu’arribe eth grop anterior.
• Quan eth grop anterior age arribat, se harà eth cambi de relhèu entà que ues autes hemnes daurisquen era corsa e pòrten eth testimòni, e es dus grops amassa seguiràn corrent ath darrèr sòn. Es grops seràn acumulatius!
• Aguesta dinamica serà succesiva enquiath tresau endret, a on se harà eth darrèr cambi de relhèu e aquiu, toti e totes amassa, poiram entrar “ena arribada en grop” ath darrèr des persones encargades de portar eth relhèu. Totes es persones participantes ena corsa auràn de demorar darrèr des persones que pòrten eth testimòni, en tot auançar atau, toti amassa.

Era part interessanta d'aguesta corsa ei que non i a guanhadores individuaus, ja qu'era participacion ei gropau. S’adapte a toti es nivèus e circonstàncies, e permet a cada participant trigar eth lòc a on vò començar, sense era obligacion de començar pera gessuda. En cas de que quauquarrés non pogue acabar era corsa , ei liure de gesser-ne quan volgue.

Ena inscripcion, se demanarà as participants en quin lòc s’i vòlen híger, e se haràn grops en cada endret.

Eth 17 de març tàs 11h començarà era corsa, mès a compdar des 10h i aurà membres dera organizacion en toti es punts de relhèu entà liurar a totes es persones participantes eth dorsau e un present pera sua participacion.

Ei important que totes es persones inscrites vagen tath punt a on s’agen inscrit entà poder organizar eth materiau e èster prèstes entà quan comence era corsa

Com m’i inscriui?

Volem fomentar era participacion de persones comprometudes, sense experiéncia enes corses, e tanben se permet era preséncia de cariotets de mainatges, acompanhadi de mainadèra e de persones d’edat. Un viatge inscriti en un punt concret, era soleta condicion ei estar en lòc designat tara ora indicada entà recéber ath grop que ven damb eth testimòni e hèr eth recorrut enquiara arribada.

Com ac hèsqui

• Clica ena huelha d’inscripcion
  
• Decidís eth sector dera corsa que vòs córrer
  
• Esta-te en aqueth endret tara ora que te digue era organizacion eth 17 de març (a partir des 10h entà remassar eth dorsau e eth present pera participacion)
  
• Seguís eth testimòni ath long de tot eth recorrut e entra ena arribada damb tota era equipa que hestege eth 8M damb tu.
  

En cada punt , es volontaris guidaràn e compartiràn informacion.

Es dates d'inscripcion seràn dubèrtes entre eth dia 26 de hereuèr e eth 15 de març.

Mapa deth recorrut

Lectura deth testimòni e liurament de prèmis deth concors de cuertmetratges

Dempús dera corsa, se harà era lectura deth testimòni que s'a hèt a passar de man en man enes relhèus dera competicion e se daràn es nòms des grops guanhadors en concors de cuertmetratges entath 8M

Ara seguida, començaram era celebracion damb un aperitiu hestiu.

Aperitiu popular

Ath long der aperitiu, gaudiram d'ua deliciosa seleccion d'embotits, panades e doci entà hestejar aguest dia especiau. Serà ua oportunitat entà compartir moments de sororitat e assaborir delícies exquisides, tà fomentar era camaraderia entre totes es persones participantes e aqueres que se higen ara celebracion.

Er aperitiu s'acompanharà damb musica en dirècte entà fomentar er ambient de hèsta e de celebracion

Concors de cuertmetratges 8M

En aguestes imatges trobaratz tota era informacion sus es condicions de participacion, es passi que cau seguir e eth formulari d’inscripcion deth concors de cuertmetratges.

E tanben podetz consultar totes es bases legaus ací:

Charrades e eveniments per tot eth territòri

Talhèrs enes escòles

En commemoracion deth 8 de març, s'amiaràn a tèrme diuèrsi talhèrs en collègis damb er objectiu d'abordar tèmes fondamentaus, com eth consentiment e era educacion afectiva-sexuau. Aguestes iniciatives vòlen hèr a préner consciéncia as estudiants de diferentes edats sus era importància dera igualtat de genre

Era pedagogia exercís un papèr cruciau en aguest enfocament, perque ua educacion sensibilizada des d'edats prumerenques contribuís ath progrès sociau. Era formacion pedagogica proporcione es bases entà bastir societats mès inclusives e equitatives, a on es naues generacions creishen damb valors de respècte, tolerància e comprension.